Shqipëria po punon për një projekt të erës në det të hapur të mbështetur nga Banka Evropiane për Rindërtim dhe Zhvillim (BERZH), sipas ministres së Infrastrukturës dhe Energjisë, Belinda Balluku. Projekti është aktualisht në një fazë studimi, tha ajo.

Kryeministri i Shqipërisë, Edi Rama, është cituar rishtazi të ketë thënë se vendi ishte “duke lëvizur para dhe duke shkuar më tej me studimin për energji të erës”, dhe që “do të përfitojë nga sasi shtesë të energjisë nga prodhimi në det të hapur”.

Rama, që kishte folur në samitin e BERZH në Londër, tha se Shqipëria po ashtu është duke eksploruar prodhimin e hidrogjenit përmes parqeve solare.

Shqipëria po zhvillon një tender për 100 MW parqe me erë në tokë

Shqipëria aktualisht nuk ka kapacitet të energjisë së erës, pavarësisht potencialit të saj të madh. Megjithatë, ajo filloi ofertën në mesin e vitit 2021 për një total prej 100 MW të parqeve me erë në tokë, dhe kuota fillestare mund të rritet në 150 MW.

Zhvilluesit e mundshëm mund të aplikojnë për projekte ndërmjet 10 MË dhe 75 MW dhe ofertuesve të suksesshëm do t’u jepen marrëveshje 15-vjeçare të blerjes së energjisë me një çmim fiks. Plani është që kontratat të miratohen deri në fund të qershorit 2023.

Po ashtu, ministria e infrastrukturës dhe energjisë më herët ka pranuar aplikime për pesë projekte të energjisë së erës me zero subvencione prej 10 MW secili, që do të ndërtohen në gadishullin e Karaburunit në jugperëndim.

IRENA: Shqipëria ka potencialin të vendosë 616 MW kapacitet të energjisë së erës deri në vitin 2030

Në një raport të botuar vitin e kaluar, Agjencia Ndërkombëtare e Energjisë së Rinovueshme (IRENA) vlerësoi potencialin me kosto efektive diellore dhe të erës të Shqipërisë në mbi 7 GW, që është më shumë se trefishi i kapacitetit total të instaluar të prodhimit të energjisë elektrike të vendit. Rreth 616 MW të potencialit të energjisë së erës mund të shpërndahen deri në vitin 2030, sipas raportit të IRENA.

Balluku: Në mars fillon ndërtimi i parkut diellor të Karavastasë 140 MW

Duke folur në një konferencë të përbashkët për shtyp me Ramën në fillim të kësaj jave, Balluku njoftoi gjithashtu se ndërtimi i parkut diellor të Karavastasë do të nisë gjatë muajit mars dhe se ai duhet të përfundojë brenda 12 muajve. Parku diellor 140 MW do të jetë një nga më të mëdhenjtë në Evropë, sipas Ballukut.

Në janar, operatori i sistemit të transmetimit të Shqipërisë, OST, tha se termocentralet e erës dhe diellore të lidhura me rrjetin e tij duhet të arrijnë një total prej 220.4 MW në vitin 2023, një rritje pothuajse dhjetëfish nga kapaciteti aktual.

Shqipëria ka një nga përqindjet më të larta të energjisë së rinovueshme në Evropën Juglindore falë kapaciteteve të saj të mëdha hidroenergjetike, por është gjithashtu shumë e varur nga reshjet vjetore, të cilat shpesh e detyrojnë atë të importojë energji elektrike./Motilokal.com