Mbetjet e uraganit Ida shkaktuan shira të furishëm dhe përmbytje në disa pjesë të Shteteve të Bashkuara. Qyteti i Nju Jorkut shpalli gjendje të jashtëzakonshme, pasi u godit nga reshje rekorde të shiut.

Kryebashkiaku Bill de Blasio tha se qyteti po përballej me një ngjarje historike të motit, me përmbytje brutale dhe kushte të rrezikshme në rrugë.

Pamjet në mediat sociale treguan ujë që derdhej në stacionet e metrosë, shtëpitë e njerëzve dhe përmbytën rrugët.

Po kështu edhe Nju Xhërsit shpalli emergjencën dhe raportoi të paktën një vdekje nga përmbytjet.

“Një person u mbyt në Passaic, Nju Xhërsit, një tornado gjithashtu shkatërroi të paktën nëntë shtëpi në Mullica Hill, në të njëjtin shtet”, tha kryebashkiaku lokal.

Kulmi i një ndërtese postare u shemb në Kearny, Nju Xhërsit, me njerëz brenda në atë kohë, tha policia. Ekipet e shpëtimit janë në vendngjarje, por nuk është e qartë se sa të lënduar mund të ketë.

Policia e Nju Jorkut u ka bërë thirrje njerëzve që të mos qëndrojnë rrugëve dhe departamenti i zjarrfikësve ka thënë se po i përgjigjet thirrjeve nga i gjithë qyteti.

Metroja e qytetit është mbyllur dhe shumë shërbime trenash dhe fluturime jashtë Nju Jorkut dhe Nju Xhërsit janë pezulluar.

Qindra mijëra shtëpi në Luiziana mbeten pa energji elektrike si pasojë e uraganit Ida. 

Shumë faktorë kontribuojnë në përmbytje, por një atmosferë ngrohjeje e shkaktuar nga ndryshimet klimatike i bën më të mundshme reshjet ekstreme.

Bota tashmë është ngrohur me rreth 1.2 gradë Celsius që kur filloi epoka industriale dhe temperaturat do të vazhdojnë të rriten, nëse qeveritë në të gjithë botën nuk bëjnë shkurtime të mëdha të emetimeve./Motilokal.com