Janë publikuar imazhet mahnitëse nga konkursi i fotografisë për botën e egër natyrore. Edicioni i 57-të i këtij viti, i cili organizohet nga Muzeu i Historisë Natyrore në Londër, kishte një numër rekord pjesëmarrësish.

Organizatorët kanë përzgjedhur imazhet mes 50 mijë aplikimeve nga 95 vende të botës, duke i gjykuar për “kreativitetin, origjinalitetin dhe përsosmërinë teknike”.

Ekspertët kanë lëshuar së fundmi një përzgjedhje të imazheve të cilat nxjerrin në pah sfidat mjedisore me të cilat përballet bota.

“Këto imazhe të jashtëzakonshme tregojnë diversitetin e pasur të jetës në Tokë, por tregojnë edhe historinë e një planeti, sfidat urgjente me të cilat përballemi dhe veprimet që duhet të ndërmarrim”, tha Doug Gurr, drejtor i Muzeut të Historisë Natyrore, në njoftimin për shtyp.

Fituesit e përgjithshëm nga konkursi i fotografisë do të shpallen më 12 tetor, dhe ekspozita e 100 imazheve fituese do të hapet në Muzeun e Historisë Natyrore në Londër tre ditë më vonë./Motilokal.com