Organizata Botërore e Meteorologjisë (OBM) të enjten ka njohur temperaturën rekord në kontinentin e Antarktidës, prej 18.3 gradë Celsius.

Nxehtësia rekord u arrit në stacionin kërkimor Esperanza të Argjentinës në Gadishullin Antarktidës më 6 shkurt 2020, tha Organizata Botërore e Meteorologjisë e Kombeve të Bashkuara.

"Verifikimi i këtij rekordi maksimal të temperaturës është i rëndësishëm sepse na ndihmon të krijojmë një pamje të motit dhe klimës në një nga kufijtë përfundimtarë të Tokës", tha sekretari i përgjithshëm i OBM-së Petteri Taalas.

"Gadishulli Antarktidës është ndër rajonet me ngrohjen më të shpejtë të planetit - gati 3 gradë Celsius gjatë 50 viteve të fundit.

"Ky rekord i ri i temperaturës është në përputhje me ndryshimin e klimës që po vërejmë."

OBM nuk e ka miratuar një lexim edhe më të lartë të temperaturës të bërë më 9 shkurt të vitit të kaluar, në një stacion automatik brazilian jo shumë larg ishullit Seymour, me 20.75 gradë Celsius.

Për rajonin e Antarktidës, temperatura më e lartë e regjistruar është 19.8 gradë Celcius më 30 janar 1982, në ishullin Signy.

Procesi i verifikimit

Në kontrollimin e dy rekordeve të reja të raportuara të temperaturës, një komitet i OBM-së e rishikoi situatën e motit në gadishull në atë kohë.

Ai zbuloi se një sistem i madh me presion të lartë krijonte erëra në rënie duke prodhuar ngrohje të konsiderueshme lokale të sipërfaqes.

Vlerësimet e kaluara kanë treguar se kushte të tilla janë të favorshme për prodhimin e temperaturave rekord, tha OBM.

Regjistrimi i ri në Esperanza do të shtohet në arkivin e ekstremeve të motit dhe klimës të OBM-së.

Temperatura më e ulët e regjistruar ndonjëherë në Tokë ishte minus 89.2 gradë Celsius në stacionin Vostok në Antarktidë më 21 korrik 1983.

Shqetësimet e ngrohjes globale

Temperatura mesatare vjetore e Antarktidës varion nga rreth -10 gradë Celsius në bregdet deri në -60 gradë Celsius në pjesët më të larta të brendshme.

Temperatura mesatare e sipërfaqes së Tokës është rritur me 1 gradë Celsius që nga shekulli i 19-të, mjaftueshëm për të rritur intensitetin e thatësirave, valëve të nxehtësisë dhe cikloneve tropikale.

Por ajri mbi Antarktidë është ngrohur dy herë më shumë.

Kërkimet e fundit kanë treguar se ngrohja me 2 gradë Celsius mund të shtyjë shkrirjen e akullit në majë të Grenlandës dhe Antarktidës Perëndimor.

"Ky rekord i ri tregon edhe një herë se ndryshimi i klimës kërkon masa urgjente", tha nënkryetarja e parë e OBM-së Celeste Saulo.

"Është thelbësore të vazhdojmë forcimin e sistemeve të vëzhgimit, parashikimit dhe paralajmërimit të hershëm për t'iu përgjigjur ngjarjeve ekstreme që ndodhin gjithnjë e më shpesh për shkak të ngrohjes globale."/Motilokal.com