Në vendin tonë në 3% sipërfaqe të ligatinave në bregdet, strehohet 75% e vlerave të biodiversitetit, ka bërë të ditur ministri i Turizmit dhe Mjedisit, Blendi Klosi në Ditën Botërore të Ligatinave.
"Ligatinat dhe Uji", është tema e Ditës Botërore të Ligatinave 2021 dhe vendos në qendër të vëmendjes ligatinat si një burim i ujërave të ëmbla dhe inkurajon veprimet për t'i mbrojtur ato dhe për të ndaluar humbjen e tyre”, është shprehur ministri Klosi.
Shqipëria është palë në Konventën Ramsar, që në vitin 1996. Ligatinat (tokat e lagura), janë ekosistemet më mirë të përfaqësuara në bregdetin shqiptar. Tipike për brigjet e ulëta aluvionale, këto ekosisteme gjenden nga veriu ne jug të vendit, duke formuar një zinxhir të vazhdueshëm me habitate shumë të dobishme.
Aktualisht, tokat e lagura janë ekosistemet me mirë të njohura dhe te paraqitura në bregdetin shqiptar. Duke filluar nga veriu, ligatinat me të rëndësishme janë: Laguna e Velipojës, Gjiri i Drinit, ku përfshihet dhe Laguna e Kune-Vainit, Fushë-Kuqe, Patok ne gjirin e Rodonit, Gjiri i Lalzit, Karavasta-Divjakë, Pylli me Pisha i Pishe-Poros, derdhja e Vjosës, Laguna e Nartës, Laguna e Orikumit, Laguna e Butrintit. Duke ndjekur interesimin ndërkombëtar për vlerat e ligatinave dhe duke parë shpejtësinë me të cilat ato po zhduken, Këshilli i Ministrave i Republikës së Shqipërisë me 22 gusht 1994 deklaroi zonën e Lagunës së Karavastasë si vend që përfshihet në listat Ramsar./Motilokal.com
