Më qindra mijëra të rinj kanë dalë në rrugë në të gjithë botën për të treguar shqetësimin e tyre në lidhje me ndryshimin e klimës. Përkundër pandemisë, pothuajse dy të tretat e njerëzve në të gjithë botën tani e shohin ndryshimin e klimës si një emergjencë globale.

Kjo është gjetja kryesore e sondazhit më të madh të opinionit për trajtimin e ngrohjes globale. Mbi një milion njerëz nga 50 vende të botës morën pjesë në sondazh. Gati gjysma e tyre ishin të moshës 14 deri në 18 vjeç.

Sipas sondazhit, konservimi i pyjeve dhe tokave është zgjidhja më e popullarizuar për trajtimin e çështjes.

Sondazhi u organizua nga Programi i Kombeve të Bashkuara për Zhvillim (UNDP), në bashkëpunim me Universitetin e Oksfordit dhe organizatorët pyetjet i shpërndanë përmes reklamave në aplikacionet e lojërave mobile në 50 vende.

“Njerëzit janë të frikësuar, i shohin zjarret në Australi dhe Kaliforni, i shohin stuhitë e kategorisë pesë në Karaibe, i shohin përmbytjet në Azinë Juglindore”, tha Cassie Flynn, këshilltare strategjike e UNDP-së.

“Ata shohin rreth vetes dhe thonë: ky është një problem i vërtetë. Ne duhet të bëjmë diçka për këtë”, shtoi Flynn.

Sondazhi u realizua midis tetorit dhe dhjetorit të vitit të kaluar./Motilokal.com