Rritja e përqendrimeve atmosferike të gazeve serë prodhon efekte në ndryshimin e klimës përkatësisht në ngrohjen e saj. Vlerësohet se në nivel global që nga viti 1990, emetimet e gazrave  serë që burojnë nga aktivitetet antropogjene janë rritur në rreth 40%, sipas raportit të publikuar nga Agjencia për Mbrojtjen e Mjedisit të Kosovës (AMMK).

Sipas këtij raporti në Kosovë emetimet totale vjetore të gazrave të serrës përgjatë periudhës 2008-2018 ndryshojnë ndërmjet 9489 Gg CO2 eq. (2008) dhe 10164 Gg CO2 eq (2016).

“Emetimet varen në masë të madhe nga kërkesa për energji dhe nga aktivitetet e sektorit të energjisë që është sektori kryesor i emetimeve në nivel vendi me 87%”, bën të ditur AMMK.

AMMK njofton se krahasuar me shtetet tjera në Evropë, Kosova ka emetime më të ulëta (5 ton CO2 ekuivalent), për kokë banori se sa mesatarja e Bashkimit Evropian, po ka emetime më të larta se sa disa nga vendet e rajonit. Ndërsa sa i përket emetimeve të CO2 për njësi të BPV (Bruto Prodhimi Vendor), Kosova me 0,5 kg CO2 ka emetime më të larta se mesatarja e Bashkimit Evropian dhe më të larta se sa vendet tjera të regjionit./Motilokal.com