Zbulimi i vaksinës kundër koronavirusit dhe frenimi i prodhimit nga OPEC+, kanë rritur çmimet e naftës, raporton Anadolu Agency (AA).

Sipas të dhënave të fundit standardi ndërkombëtar i naftës së papërpunuar Brent tregtohej me 44,16 dollarë për fuçi në mëngjes, duke shënuar rritje prej 3,23 për qind pasi u mbyll të hënën me 42,78 dollarë për fuçi.

Ndërsa standardi amerikan West Texas Intermediate tregtohej me 41,58 dollarë për fuçi në të njëjtën kohë, me rritje prej 0,58 për qind pasi pas mbylljes së sesionit të mëparshëm me 41,34 dollarë për fuçi.

Çmimet e naftës u rritën pas zhvillimeve pozitive të testimit të vaksinave. Këto zhvillime vijnë në një kohë kur numri i rasteve me COVID-19 është në rritje dhe ka detyruar shumë vende të vendosin bllokime dhe të marrin masa të rrepta për të parandaluar përhapjen e pandemisë.

Së fundmi prodhuesi amerikan i ilaçeve Pfizer dhe firma gjermane e bioteknologjisë BioNTech njoftuan se vaksina e tyre për koronavirusin është 95 për qind efektive.

Edhe në anën tjetër kompania amerikane bioteknike Moderna njoftoi të hënën se vaksina e saj kundër koronavirusit është 94,5 për qind efektive.

Investitorët interesohen për vendimin e frenimit të prodhimit të OPEC+

Takimi i 46-të i Komitetit të Përbashkët Teknik të Deklaratës së OPEC-ut të vendeve pjesëmarrëse të hënën nuk mori vendimin e pritur për një frenim të mëtejshme të prodhimit. Megjithatë, investitorët tani janë duke pritur për rezultatin e Komitetit të Përbashkët të Monitorimit të Ministrave të martën që monitoron nga afër sa naftë bruto prodhon secili anëtar i OPEC+.

Sinjalet e një rikuperimi të shpejtë të kërkesës për naftë nga përdoruesi i dytë më i madh i naftës në botë, Kina, u panë kur prodhimi i naftës bruto u rrit në nivelin më të lartë në tetor duke mbështetur prirjen për rritjen e çmimeve të naftës./Motilokal.com