Mijëra banorë janë larguar nga një qytet në Kaliforninë veriore të Mërkurën ndërsa një seri zjarresh janë përhapur me shpejtësi në të gjithë shtetin, duke djegur dhjetëra shtëpi dhe pyje.

Zjarri jashtë Vacaville - një qytet me rreth 100,000 banorë që ndodhet midis kryeqytetit shtetëror Sakramento dhe San Francisko - është pjesë e një seri zjarresh që kanë djegur gati 50,000 hektarë në rajon ditët e fundit.

"Nëse ju kërkohet të evakuoni, ju lutemi veproni kështu në mënyrë të sigurt", tha policia Vacaville në Twitter.

"Praktikisht çdo njësi përgjegjëse në qytet po punon në mënyrë aktive për të njoftuar, evakuuar dhe luftuar zjarret në mënyrë të sigurt, kështu që banorët tanë janë të sigurt."

Shumë njerëz pësuan djegie ndërsa vraponin për të shpëtuar jetën e tyre.

Ekipet e shpëtimit mund të shiheshin duke luftuar për të mbrojtur shtëpitë nga flakët dhe për të shpëtuar kafshët, disa prej të cilave nuk mbijetuan.

Guvernatori Gavin Newsom shpalli të martën gjendjen e jashtëzakonshme si rezulat i zjarreve, duke përgatitur terrenin për grante federale dhe dërgimin e ekipeve të zjarrfikësve nga jashtë shtetit të Kalifornisë.

"Kalifornia është goditur nga 10.849 rrufe në 72 orët e fundit dhe temperaturat e nxehtësisë kanë arritur në rekord", tha Newsom në një cicërimë. "Tani po luftojmë 367 vatra zjarresh.

"Mirënjohës për zjarrfikësit tanë, përgjegjësit e parë dhe të gjithë në vijën e parë të mbrojtjes së Kalifornianëve gjatë kësaj kohe."

Ai tha se departamentet e zjarrfikësve në shtetet afër, përfshirë Nevada, Arizona dhe Texas, po dërgonin përforcime për të ndihmuar në luftimin e zjarreve. 

Në javën e kaluar, Lugina e Vdekjes në Kaliforni regjistroi temperaturën më të lartë ndonjëherë 54.4 gradë Celsius.

Gati 45 milion njerëz në të gjithë Shtetet e Bashkuara perëndimore ishin paralajmëruar për rritjen e temperaturave.

Autoritetet paralajmërojnë për ndërprerje të ardhshme si rezultat i stresimit të sistemit nga përdorimi në masë i ajrit të kondicionuar në këto temperatura.

Guvernatori ka urdhëruar një proces hetimor mbi problemet e shfaqura në rrjet.

Zjarri si dhe stuhitë në këtë periudhë uraganesh përbëjnë pengesë në betejën me koronavirusin, tha John Swartzberg, ekspert i sëmundjeve infektive dhe profesor në pension i Universitetit UC Berkeley, i cili ka shërbyer si konsulent për autoritetet në këtë situatë.

“Nëse je prekur nga COVID-19 dhe ekspozohesh ndaj tymit dhe grimcave ndotëse në ajër, si rezultat i zjarrit, sëmundja bëhet edhe më e rëndë,” thotë eksperti për gazetën East Bay Times.

Zjarret mund të keqësojnë përhapjen e koronavirusit, pasi situata ka bërë të nevojshme sjelljen e ekipeve të shumta të reagimit nga pika të ndryshme të shtetit.

“Ky është kombinimi perfekt i kushteve që duhen shmangur në një pandemi,” thotë Swartzberg./Motilokal.com