Një anije japoneze nga e cila kanë rrjedhur qindra tonë karburant pranë brigjeve të Mauritius, është ndarë në dysh, thanë autoritetet e vendit ishullor.

MV Wakashio, ngeci në tokë në një barrierë koralore më 25 korrik me 4 mijë ton karburant duke shkaktuar një emergjencë ekologjike. Pjesa më e madhe e karburantit është nxjerrë me pompa jashtë, thanë zyrtarët, por të shtunën, gjendja e anijes u përkeqësua.

Anija japoneze kishte rreth 4000 tonë naftë në bord kur pësoi aksidentin dhe 1000 tonë përfunduan në ujë, duke mbërritur deri në plazhet fantastike të ishullit që është edhe një destinacion turistik tepër i preferuar.

Rreth 100 ton naftë ishin ende në anije në momentin e ndarjes së saj në dy pjesë. Fotot janë publikuar vetëm të shtunën nga autoritetet vendase, por nuk është konfirmuar kur ka ndodhur ndarja e mjetit lundrues.

Qeveria në Mauritius tha se do të kërkojë kompensim për rrjedhjen dhe dëmin e jashtëzakonshëm që i është shkaktuar, pasi nafta ka mbuluar disa nga plazhet më të bukura të ishullit, të famshëm për ujin e kristaltë dhe natyrën e paprekur. Kompania japoneze që zotëron anijen ka premtuar se do t’i përgjigjet kërkesave për kompensim. Deri tani janë dëmtuar rreth 11,5 kilometra vijë bregdetare.

Sipas ligjeve ndërkombëtare, përgjegjës për dëmin është kompania japoneze Nagashiki Shipping që ka në pronësi anijen dhe sipas një zyre ligjore në Tokio, dëmi mund të kalojë 19 milionë dollarët./Motilokal.com