Organizata “Shpendët e Shqipërisë”, ka bërë të ditur se një tjetër flamingo i unazuar është fotografuar nga vullnetarët tanë në kriporen e Vlorës.
“Ky ekzemplar është unazuar në 31 korrik të vitit 2017 në kriporen e Priolos e ndodhur pranë qytetit historik të Sirakuzës në ishullin Italian të Sicilisë dhe ka përshkruar rreth 530 km për të arritur në kriporen e Vlorës. Flamingo është raportuar si lloj rastësor në Shqipëri që në fillim të vitit 60-të. Mbas viteve 90-të numri i flamingove në vendin tonë ka filluar të rritet ndjeshëm, duke arritur shifra të përhershme me mbi 2000 individë në 10 vitet e fundit”, thuhet në njoftim.
Sipas njoftimit të kësaj organizate në numër më të madh ky lloj haset në Peizazhin e Mbrojtur Vjosë-Nartë si dhe në Parkun Kombëtar Divjakë-Karavasta. Megjithatë është vrojtuar pothuajse në të gjitha ligatinat bregdetare te vendit, madje edhe më tutje, sikurse është rasti i liqenit të Pogradecit.
Nga hasja e individëve të unazuar origjina e flamingove që shihen në vendin tonë është nga: Spanja, Franca, Italia dhe Turqia.
Ky lloj ende nuk folezon në Shqipëri edhe pas tentativave disa vjeçare tashmë për të krijuar një koloni në kriporen e Vlorës./Motilokal.com
