Me siguri nuk është një plazh shumë i dëgjuar për shumicën e turistëve dhe aq më pak i vizituar. Plazhi i Krorëzës është një nga xhevahiret e tjerë të Rivierës shqiptare, një plazh me të cilin mund të bieni “në dashuri me shikim të parë” sapo ta vizitoni. Për fat të mirë mund të thuhet në kontekstin shqiptar, ai mbetet ende një plazh i pashfrytëzuar në masë nga turistët dhe vizitorët, dhe që të ofron vetëm atë çka natyra i ka falur.

Kryeministri Edi Rama në profilin e tij ka publikuar disa foto nga ky plazh i mrekullueshëm, si ftesë për turistët të huaj dhe pushuesit vendas gjatë këtij sezoni turistik.

Plazhi i Krorëzës, i cili përbëhet nga dy pjesë të ndara me njëra-tjetrën nga disa shkëmbinj të vegjël, ndodhet midis plazhit të Shpellë-Lukovës (në veri të tij) dhe Gjirit të Kakomes (që e ka në jug të tij).

Është një plazh i virgjër, nuk ka kurrfarë rruge makine që mund t’iu çojë në të, dhe e vetmja mënyrë për ta eksploruar dhe shijuar është nga toka ose nga deti (me varkë).

Zona më e afërt e vendbanimit me plazhin e Krorëzës është fshati i Shën Vasilit (para se të shkoni në Sarandë nga rruga e Bregut), ku banorët e zonës i shfaqin nëpër lokale me krenari peizazhet natyrore që ofron bregdeti i Krorëzës./Motilokal.com