Mijëra vullnetarë janë në garë me kohën për të përmbajtur dëmet e shkaktuara nga rrjedhja e naftës në plazhet përrallore të ishullit Mauritius të dielën.

Më shumë se 1.000 ton naftë janë derdhur nga anija transportuese japoneze MV Wakashio, duke shkaktuar një katastrofë të vërtetë ekologjike në vendin e njohur jo vetëm për plazhet me ujë të kristaltë, por edhe pyjet dhe speciet në rrezik zhdukjeje që mban.

Përpjekjet për të stabilizuar anijen e përplasur që më 25 korrik janë të vazhdueshme.

Japonia do të dërgojë ekspertët e saj për të ndihmuar autoritetet vendase, ndërsa një anije ushtarake franceze është afruar në zonë për të dhënë kontributin e saj. Deri tani janë rikuperuar më shumë se 4000 ton naftë, por fatkeqësisht 1000 ton kanë përfunduar në det, duke ndotur ambientin përrallor.

Presidenti i kompanisë detare që ka në pronësi anijen, Akihiko Ono, u tha gazetarëve në Tokio se do të bëjë gjithçka për të riparuar dëmet, por ambientalistët thonë se është tepër vonë.

Aktivistja suedeze Greta Thunberg u bëri thirrje sot miliona pasuesve të saj që të dhuronin në një fond për ishullin Mauritius pasi vendasit e informuan për 'urgjencën mjedisore' në ishullin e Oqeanit Indian./Motilokal.com