Elon Musk ka prezantuar Tesla Roadster-in e shumëpritur, duke tërhequr vëmendjen me një demonstrim të pazakontë të aftësive që pretendon se do t’i ketë vetura e re elektrike.

Gjatë një ngjarjeje të transmetuar drejtpërdrejt të enjten në mbrëmje, drejtuesi i Tesla-s u tha të pranishmëve se demonstrimi ishte aq i jashtëzakonshëm, saqë duhej të shihej nga afër për t’u besuar.

Sipas demonstrimit të prezantuar, Roadster-i kreu manovra të pazakonta, duke përfshirë lëvizje akrobatike, kërcime mbi automjete të tjera dhe rrotullime në ajër. Musk shpjegoi se këto lëvizje lidhen me një sistem shtytës të zhvilluar në bashkëpunim me SpaceX, i cili synon t’i japë veturës aftësi të pazakonta përtej drejtimit tradicional në rrugë.

“Epo, funksionoi”, deklaroi Musk pas demonstrimit, duke lënë të kuptohet se projekti po ecën drejt realizimit të synimeve ambicioze të kompanisë.

Ai bëri të ditur se sistemi përfshin motorë të vegjël për kontrollin e pozicionit dhe motorë shtytës në pjesën e pasme. Sipas tij, kjo teknologji mundëson manovra të veçanta, ndonëse ai pranoi me humor se një veturë e tillë nuk është domosdoshmërisht e projektuar duke pasur sigurinë si përparësi në këto lëvizje akrobatike.

Një tjetër pretendim i Tesla-s lidhet me përshpejtimin e jashtëzakonshëm. Sipas të dhënave të paraqitura, Roadster-i synon të arrijë shpejtësinë prej rreth 100 kilometrash në orë për më pak se një sekondë.

Tesla ka bërë të ditur se rezervimet për modelin e ri janë të hapura dhe se ai pritet të ofrohet në tri versione: Performance, Thrust dhe Rocket.

Sa u përket specifikave, kompania pretendon se automjeti do të ketë autonomi mbi 480 kilometra, ndërsa versioni Rocket synon një shpejtësi maksimale prej më shumë se 370 kilometrash në orë.

Me këto karakteristika të pretenduara, Roadster-i synon të vendosë standarde të reja për veturat elektrike sportive. Megjithatë, performanca përfundimtare dhe aftësitë e demonstruara do të duhet të vlerësohen në kushtet reale të përdorimit.

/Motilokal.com