Qeveria libiane e ka shpallur qytetin e Dernës një zonë katastrofe pasi dyshohet se dhjetëra të vdekur pas përmbytjeve të shkaktuara nga stuhia mesdhetare Daniel.

Stuhia u intensifikua gjatë natës ndërsa arriti në bregun libian gjatë fundjavës, duke lënë një gjurmë përmbytjesh dhe shkatërrimesh pas saj, ndërsa Egjipti po përgatitet për stuhinë që të godasë pjesët perëndimore të vendit.

Deri në 50 persona dyshohet se kanë vdekur në qytetin Derna, raportojnë mediat libiane.

Të paktën një person u konfirmua i vdekur për shkak të stuhisë pasi ai mbeti i bllokuar brenda veturës së tij i rrethuar nga përmbytje të mëdha. Një numër shtëpish u shkatërruan gjithashtu në disa zona të Libisë lindore.

Walid Al Arfi, zëdhënësi i ekipit të qeverisë për reagimin e urgjencës, e identifikoi njeriun si Othman Abu Khuwaydim Al Darsi dhe tha se ai vdiq të dielën pasi u rrethua nga përmbytjet e rrëmbyeshme në zonën Batta, në lindje të qytetit Al Marj.

Si masë paraprake, autoritetet libiane mbyllën katër portet kryesore të naftës, përfshirë Ras Lanuf, Zueitina, Brega dhe Es Sidra, për tre ditë të shtunën në mbrëmje.

Korporata Kombëtare e Naftës në pronësi të Libisë shpalli gjendjen e gatishmërisë maksimale përpara stuhisë.

"Ju kërkohet të monitoroni portet dhe lëvizjen e anijeve që të merrni masa për të ruajtur nivelet më të larta të sigurisë ... dhe të merrni masa për të mbrojtur njësitë industriale, linjat e prodhimit dhe njësitë e magazinimit", tha NOC në një mesazh për kompanitë e saj të lidhura.

Libianët filluan të shpërndanin pamje në mediat sociale, duke kërkuar ndihmë nga autoritetet dhe duke thënë se po përballeshin me sfida pasi uji i shiut përmbyti shtëpitë dhe lagjet e tyre.

Të shtunën, autoritetet në Libinë lindore shpallën gjendjen e jashtëzakonshme, e cila përfshinte pezullimin e orëve të mësimit në të gjitha institucionet arsimore publike dhe private, mbylljen e dyqaneve dhe zbatimin e shtetrrethimit.

Javën e kaluar, stuhia Daniel goditi Greqinë për tre ditë në fund të verës më të nxehtë të regjistruar, duke lënë një gjurmë të re rrënimi pas zjarreve vdekjeprurëse.

Ekipet greke të shpëtimit gjetën trupat e katër personave të tjerë në zonat qendrore të vendit të dielën, duke e rritur në 15 numrin e të vdekurve nga stuhia më e fortë e shiut në vend që nga fillimi i regjistrimeve në vitin 1930.

Autoriteti Meteorologjik Egjiptian paralajmëroi qytetarët të dielën se stuhia Daniel do të arrijë në vend të hënën, e shoqëruar me shira dhe mot të paqëndrueshëm në pjesët perëndimore të vendit.

“Këto kushte të motit do të prekin pjesë të Egjiptit perëndimor, duke përfshirë Salloum, Marsa Matruh dhe Siwa. Reshje të lehta deri në mesatare pritet të përhapen në pjesë të Aleksandrisë në mbrëmje”, tha EMA.

Shiu i lehtë deri në mesatar do të lëvizë gradualisht në brendësi të tokës për të prekur pjesë të deltës jugore, qytetet e kanaleve dhe ndoshta Kajron.

/Motilokal.com